ໂຄງການດັ່ງກ່າວແມ່ນ ໄດ້ຮັບທຶນກໍ່ສ້າງ ແລະ ເປັນຂອງຂວັນຈາກ ທ່ານ ຫງຽນ ຊວນ ຟຸກ ປະທານປະເທດ ແຫ່ງ ສສ. ຫວຽດນາມ ທີ່ໄດ້ເດີນ ທາງມາຢ້ຽມຢາມ ສປປ ລາວ ໃນເດືອນ ສິງຫາ 2021 ທີ່ຜ່ານມາເຊິ່ງລວມມູນຄ່າ  5 ລ້ານໂດລາ ສະຫະລັດ. ໃນນີ້ໄດ້ຈັດສັນງົບປະມານເຂົ້າໃນການປັບປຸງພື້ນຖານໂຄງລ່າງ 3 ລ້ານໂດລາສະຫະລັດ, ນຳ ໃຊ້ເຂົ້າໃນການສະໜອງອຸປະກອນເຕັກນິກ ແລະ ວັດສະດຸ 1 ລ້ານກວ່າໂດລາສະຫະລັດ ແລະ ວຽກງານ ວິຊາການ, ຝຶກອົບຮົມ, ບໍລິຫານ 5 ແສນໂດລາສະຫະລັດ. ໂດຍປະຕິບັດຕາມສັນຍາສະບັບເລກທີ 1.284/ສສກ ກ່ຽວກັບໂຄງການກໍ່ສ້າງໂຮງຮຽນວິຊາຊີບຕົວແບບມິດຕະພາບລາວ - ຫວຽດນາມ ມອບໃຫ້ ບໍລິສັດ ຈິດຈະເລີນ ກໍ່ສ້າງຈຳກັດເປັນຜູ້ຮັບເໜົາກໍ່ສ້າງໃນມູນຄ່າ 2 ລ້ານກວ່າໂດລາສະຫະລັດ ປະກອບມີ ການກໍ່ສ້າງອາຄານຮຽນ 4 ຫລັງ, ອາຄານບໍລິຫານ 1 ຫລັງ, ກໍ່ສ້າງຫໍພັກ 2 ຊັ້ນ 3 ຫຼັງ, ຫ້ອງທົດລອງ 1 ຫລັງ, ຫ້ອງບໍລິຫານ 1 ຫລັງ, ໂຮງຊ່າງ 4 ຫຼັງ (ໄຟຟ້າ, ສ້ອມແປງ, ກໍ່ສ້າງເຄຫະສະຖານ ແລະ ກະສິກໍາ), ກໍ່ສ້າງລະບົບຫ້ອງນໍ້າຊາຍ - ຫ້ອງນໍ້າຍິງ, ກໍ່ສ້າງລະບົບເສັ້ນທາງສັນຈອນພາຍໃນໂຮງຮຽນ, ກໍ່ສ້າງລະບົບນໍ້າໃຊ້ - ນໍ້າເສຍ ແລະ ອື່ນໆ ຈະໄດ້ເລີ່ມລົງມືຈັດຕັhງປະຕິບັດ ແລະ ໃຫ້ສຳເລັດການກໍ່ສ້າງ ພາຍໃນ 11 ເດືອນ ຕາມແຜນຂອງໂຄງການ.

ທ່ານ ນາງ ຫວູ ຕູແອ໋ງ ທີປຶກສາສະຖານເອກອັກຄະລັດທູດ ແຫ່ງ ສສ ຫວຽດນາມປະຈຳລາວ ໄດ້ກ່າວວ່າ : ການກໍ່ສ້າງໂຮງຮຽນແບບພິເສດຄັ້ງນີ້ແມ່ນສະແດງໃຫ້ເຫັນເຖິງຄວາມຍິ່ງໃຫຍ່ແຫ່ງການຮ່ວມ ມືຮອບດ້ານລະຫວ່າງສອງພັກສອງລັດ ແລະ ປະຊາຊົນທັງສອງປະເທດຫວຽດນາມ - ລາວ, ລາວ - ຫວຽດນາມ ສະແດງໃຫ້ເຫັນເຖິງຄວາມເອົາໃຈໃສ່ຂອງການນຳທັງສອງປະເທດ ສຳລັບພາລະກິດໃນການສຶກສາ ແລະ ພັດທະນາໂຄງລ່າງພຶ້ນຖານ ແລະ ບຸກຄະລາກອນຂອງລາວ ເວົ້້າສະເພາະກໍ່ຄືແຂວງຄຳມ່ວນ ສະແດງ ໃຫ້ເຫັນເຖິງຄວາມສະນິດຕິດພັນ ແລະ ຄວາມຮັກແພງຂອງ ທ່ານ ຫງຽນ ຊວນ ຟຸກ ປະທານປະເທດແຫ່ງ ສສ ຫວຽດນາມ ທີ່ມີຕໍ່ຄົນລຸ້ນໃໝ່ຂອງລາວ ເພື່ອສືບຕໍ່ໃນການຮັກສາຄວາມສາມັກຄີຍິ່ງໃຫຍ່ໃນການ ພົວພັນຮ່ວມມື. ຢັ້ງຢືນວ່ານີ້ໂຄງການນີ້ຈະສຳເລັດ ແລະ ເປີດການນຳໃຊ້ໃນທ້າຍປີ 2022 ເພື່ອເປັນການ ສະເຫລີມສະຫລອງ ແລະ ຂໍ່ານັບຊົມເຊີຍ 2 ວັນປະຫວັດສາດ ຄື : 60 ປີ ແຫ່ງການສ້າງຕັ້ງສາຍພົວພັນການ ທູດ ຫວຽດນາມ - ລາວ ແລະ 45 ປີ ວັນເຊັນສົນທິສັນຍາມິດຕະພາບ ແລະ ການຮ່ວມມື ຫວຽດນາມລາວ ແລະ ລາວຫວຽດນາມ.

ໂອກາດນີ້ ທ່ານ ວັນໄຊ ພອງສະຫວັນ ເຈົ້າແຂວງຄຳມ່ວນ ໄດ້ກ່າວຕໍ່ພິທີວ່າ : ໂຄງການ ກໍ່ສ້າງໂຮງຮຽນວິຊາຊີບຕົວແບບມິດຕະພາບ - ລາວຫວຽດນາມ ແມ່ນໂຄງການທີມີຄວາມໝາຍ ຄວາມສໍາຄັນ ທີ່ສຸດຕໍ່ແຜນພັດທະນາຂະແໜງການສຶກສາທິການ ແລະ ກິລາກໍ່ຄືແຜນພັດທະນາເສດຖະກິດ - ສັງຄົມ ຂອງ ແຂວງຄໍາມ່ວນ ດ້ວຍທຶນຊວຍເຫລືອລ້າ ເປັນຂອງຂວັນຈາກພັກຄອມມຸຍນິດ ແລະ ລັດຖະ ບານຫວຽດນາມ. ເຊິ່ງໄດ້ກຳນົດເອົາໂຮງຮຽນມັດທະຍົມສອງເໜືອງເປັນບ່ອນສ້າງຕັ້ງຕິດພັນກັບສະຖານທີ່ປະຫວັດສາດການ ເຄື່ອນໄຫວຂອງປະທານໂຮຈິມິນ. ໂຄງການກໍ່ສ້າງໂຮງຮຽນວິຊາຊິບຕົວແບບແຫ່ງນີ້ເປັນໂຮງ ຮຽນແຫ່ງທຳອິດ ຂອງແຂວງທີ່ປະຕິບັດ 2 ຫລັກສູດ ການຮຽນ - ການສອນຄວບຄູ່ກັນໄປ. ພາຍຫລັງໂຄງ ການກໍ່ສ້າງສຳເລັດ ແລະ ເປີດນຳໃຊ້ຈະກາຍເປັນສະຖານທີ່ສຳຄັນ ໃນການຝຶກອົບຮົມວິຊາຊີບໃຫ້ນັກຮຽນ ມັດທະຍົມ, ຜູ້ ຫວ່າງງານ, ຜູ້ດ້ອຍໂອກາດ, ຜູ້ກຳລັງຊອກອາຊີບ ແລະ ຜູ້ຕ້ອງການປ່ຽນອາຊີບ ໂດຍສະເພາະຈະຊ່ວຍ ແກ້ໄຂບັນຫາແຮງງານຂາດສີມືທິ່ເດີນທາງກັບຈາກການໄປອອກແຮງງານຢູ່ຕ່າງປະເທດໄດ້ເຂົ້າມາຝຶກອົບຮົມວິຊາຊີບພັດທະນາສີມືແຮງງານ ແລະ ສ້າງເງື່ອນໄຂໃຫ້ມີວຽກເຮັດງານທຳ ເປັນກຳລັງແຮງປະກອບສ່ວນ ໃນການສ້າງສາພັດທະນາ ປະເທດຊາດ ກໍ່ຄືພັດທະນາແຂວງຄຳມ່ວນໃຫ້ມີຄວາມຈະເລີນຂຶ້ນໄປເລື້ອຍໆ.